Dibabet ez eus bet gant Kêr Garaez enoriñ ar C'hoarezed Gwadeg evel ma tle en ur urzhiañ un delwenn skeudennus en arem, dezhi 2 m a uhelder, digant an arzourez Annick Leroy eus Roazhon.
Tanon (1900-1983), Tazi (1913-1998) hag Ujeni Gwadeg (1909 - 18 a viz Genver 2003), o-zeir genidik eus Trefrin, o doa kemeret perzh e nevezidigezh ar festoù-noz, roet lañs dezho en-dro gant Loeiz Ropars, Albert Trevidig hag un nebeud emsaverien sevenadurel breizhat all er bloavezhioù 50.
Evel ar Vreudeur Morvan e chom hag e chomo ar c'hoarezed Gwadeg an dave evit kan ar bobl e brezhoneg hag evit ar c'han-ha-diskan. Dre ma veze kanet ganto e festoù-noz a-leizh o doa lakaet an dud da ober anaoudegezh gant o c'han deuet betek enno dre un hir a hengoun familh eus Kreiz-Breizh. Meur a wech o doa bet tro da genlabourat gant an telennour Alan Stivell. Paouezet en doa an triad da ganañ e 1983, pa oa aet ar c'hoar henañ, Tanon, d'an Anaon. E 1994 e oa bet asantet gant Ujeni mont war al leurenn en-dro evit lidañ he 85vet deiz-ha-bloaz, goude ma oa bet boutet warni gant he merc'h, Louise Ebrel, ur ganerez brudet, hi ivez.
An arzourez eus Roazhon, Annick Leroy, he deus dibabet skeudenniñ anezho war al leurenn « ar stad a oa enno o vezañ war al leurenn, ar blijadur o deveze o kanañ hag o lakaat an dud da zañsal... Tazi oc'h ober ur damsell malisius ouzh Ujeni zo o vourc'hoarzhin en ur ganañ, int o-div o tistagañ ar memes silabenn eus an diskan. Tanon, a leze ur mousc'hoarzh da vleuniañ war he muzelloù, evel kustum, en ur gas ar c'han. Lugerniñ a ra he selloù prim. Santout a reer ez eus maouezed a benn anezho. Ur eurvad eo sellet outo. »
Gwir eo ez eo un estlamm gwelet al labour kizellañ. Deuet eo a-benn an arzourez da gizellañ ha da vont er munudoù evit skeudenniñ dremmoù ar c'hoarezed Gwadeg goude bezañ klasket, lennet ha gwelet teulioù e-pad pell amzer. Adkavet he deus filmoù e Gwarez filmoù Breizh hag ivez en INA, met ivez luc'hskeudennoù eus ar mare-se er c'hazetennoù ha war ar Genrouedad. « Emaon bepred o klask luc'hskeudennoù eus ar mare-se evit kizellañ eus ar gwellañ dilhad ar c'hoarezed Gwadeg. Ma'z eus luc'hskeudennoù gant tud zo e c'hallont mont e darempred gant an Ti-kêr », eme an arzourez.
Meur a vloaz zo dija he doa c'hoant Kêr Garaez da enoriñ ar c'hanerezed brudet eus Breizh. « Ar c'hizelladur-se, zo bet rakwelet degas anezhañ e miz Kerzu, a vo lakaet war un dorgenn war-dro 1 m, troet ouzh ar Su, e-kreiz kêr, e krec'h plasenn ar Marc'hallac'h, eme ar maer. Al lec'h gwellañ eo evit lakaat anezhi da dalvezout ha rakwelet hon eus adkempenn penn-da-benn al lec'h-mañ evit ober ul lec'h plijus anezhañ evit bale war droad ».
Sammad hollek al labourioù kizellañ a sav da 126 603 €. Ar Rannvro he deus asantet dja reiñ ur skoaziadenn a 12 500 €. Goulennoù skoaziadennoù all emeur o sevel. C'hoant o deus an dilennidi da lakaat un niver bras a dud da gemer perzh er raktres-se dre reiñ lañs d'ur sav-arc'hant poblek kaset gant Kêr.
« Dre e zonezon e c'hallo pep hini lavaret en doa degaset e lod pa oa bet lakaet sevel un oberenn arz hag hi en enor, ouzhpenn-se, d'ar c'hanerezed brudet o deus merket istor sevenadurel Breizh », eme Gristian Troadeg. Seul vuioc'h ma c'haller didennañ ar roadennoù-se eus an tailhoù, betek 66 % evit an hiniennoù ha betek 60 % evit an embregerezhioù.
Paperennoù reiñ arc'hant a c'haller kaout el lec'hioù foran e Karaez ha da bellgargañ amañ dindan.