Abaoe daou vloaz emañ ar produioù bio eus ar vro o c'hounit tachenn en asiedoù skolidi Karaez. E soñj emeur ober kement all er gumuniezh-kumunioù a-bezh.
« Roit produioù bio hag eus ar vro d'hor bugale ! ». Setu c'hoant un toullad a vammoù hag a dadoù hag a adkaver en asiedadoù hor skolidi. Mennet eo an Ti-kêr ha Sylvie Castel, eus Servij Skolioù ar Gumun, a daol evezh bras ma vo doujet ouzh ar c'hoant-se.
« Ar predoù servijet e skol Boulouard ar Republik, er skol Uhelañ, e skol Kerwenn ha skol Diwan a vez fardet gant an DSSL* Kan ar Mor a ya en-dro gant strolloù prenañ. Amredoù berr dezho o-unan o deus, prenañ a reont pesked fresk war vord ar mor hag ar memes produioù bio ha ni o deus. Gant keginer Kan ar Mor e tivizomp asambles ar rolloù-meuzioù, da vezañ aprouet gant ar vouedourez, evit seizh sizhunvezh, a vakañsoù da vakañsoù. En em harpañ a reomp war erbedadennoù Strollad studi marc'hadoù ar pretierezh stroll hag ar mezhur (SSM-PSM) ».
Gant Sylvie Castel e vez graet war-dro an urzhiadoù evit ar predoù a vez fardet war-eeun e-barzh kantin skol Persivien. « Holl ar frouezh hag al legumaj a vez prenet ganeomp digant ur brazwerzher eus Karaez pe digant ul labourer-douar bio en Aodoù-an-Arvor. Prenañ a reomp karotez, avaloù-douar ha legumaj eus ar c'houlz-amzer bewech ma c`hallomp. Bio eo ar boued bleudennek. » « Ar c'hig a vez urzhiet e ti saverien eus Penn-ar-Bed. Al laezh a vez produet er vro. « Ar pal eo harpañ ekonomiezh ar vro ha kempouezañ ar c'hementadoù. Degaset e vez ar produioù deomp diouzh an deiz ».
Abaoe miz C'hwevrer emeur o prederiañ evit ma vo keginet ha servijet produioù bio eus ar vro er pretioù stroll er gumuniezh-kumunioù a-bezh. Evit respont d'ur galv da raktresoù lañset gant Kuzul-rannvro Breizh war ziorroadur filirennoù nes ar boued e ouestl Bro Kornôg Kreiz-Breizh diorren an implij eus ar produioù biologel eus ar vro er pretierezh stroll. Ha Poc'hêr kumuniezh zo bet dalc'het evel korn-bro blein.
Gallout a ra pretioù stroll ar Gumuniezh-kumunioù bezañ ambrouget a-ratozh-kaer, m'o deus c'hoant, gant Ti ar Boued Bio e Penn-ar-Bed, ur gevredigezh etremicherel eus an departamant zo bodet enni produerien, dasparzherien, treuzfurmerien ha bevezerien. He fal zo kas al labour-douar biologel ha filierennoù ar vro war-raok.
« Ur bilañs kentañ hon eus graet gant ar Mab (Ti al Labour-douar Bio). Aet eo kalz war-raok hon difrae e Karaez dija. Emañ ar gevredigezh o vont da skoazellañ ac'hanoc'h da brientiñ produioù, ar rekipeoù, da gavout pourchaserien tostoc'h, dreist-holl evit ar bara. »
61 948 pred zo bet fardet evit skolioù publik ar gumun.
400 pred a vez fardet bemdez evit ar vugale, mui un tregont pred bennak evit an dud-deuet a ra war o zro.
1,214 tonenn. Anv zo eus ar c'hementad legumaj servijet en holl er c'hantinoù.
521 kg. Anv zo eus ar c'hementad legumaj bio servijet en asiedoù.
283 kg a riz, toazennoù, semoul, fer... bio a vez debret ivez.
Tost da 1 donennad kig a zo bet debret gant ar vugale. Bezet 526 kg a gig-yar, 168 kg a gig-bevin, 207 kg a gig-moc'h, hep kontañ ar 1 008 chipolata, an 480 mergezenn hag ar 480 silzigenn giz Tolosa.